.svg)
Ísland
Nafnið sem allir þekkja. Nokkrar goðsagnir eru í kringum nafnið yfir land vort, en er reyndar ekki hið upprunulega nafn Íslands né er það í öðru sæti. Hrafna-Flóki, sá þriðji sem mætti hingað til Íslands, er sá sem gaf Íslandi sitt nafn. Hrafna-Flóki (Flóki Vilgerðarson) frétti um Ísland eftir að Garðar Svavarsson og Naddoddur fundu landið, tilvist landsins fréttist til vesturstranda Noregs og lagði þá seinna Hrafna-Flóki af stað með Þórólfi og Herjólfi, tveimur bændum. Hrafna-Flóki er svo kallaður því hann notaði þrjá hrafna til að rata til landsins. Sá fyrsti flaug aftur til Noregs. Annar settist aftur niður á skipið eftir að hann flaug upp. Sá þriðji flaug til Íslands. Þar sem Hrafna-Flóki og bændurnir tveir lentu var á Vatnsfirði á Barðarströnd og var fjörðurinn fullur af veiðiskapi. Svo mikil var veiðin að Hrafna-Flóki og menn hans gleymdu að heyja um sumarið með þeim afleiðingum að allar skepnur þeirra drápust um veturinn. Flóki gekk upp á fjall eitt á Vatnsfirði og sá þá ofan á annan fjörð, líklega Arnarfjörð, og var hann fullur af hafís. Í 2. kafla Landnámu segir að eftir þetta hafi Hrafna-Flóki og menn hans nefnt landið Ísland. Hrafna-Flóki hafði litlar mætur á landinu. Í Landnámu segir að hann hafi siglt aftur til Noregs með mönnum sínum: „Og er menn spurðu af landinu, þá lét Flóki illa yfir, en Herjólfur sagði kost og löst af landinu, en Þórólfur kvað drjúpa smjör af hverju strái á landinu, því er þeir höfðu fundið; því var hann kallaður Þórólfur smjör." (Landnámabók, 2. kafli).